Deixo por aquí o exame que realizamos o pasado día 7 de maio que contou para a nota final da 3ª avaliación en 4º ESO.
Como poderedes comprobar todos os conceptos foron vistos na aula.
1. Comentario breve dun poema vangardista (visto na aula e no libro)
2. Esquema temático sobre parte da materia
3. Preguntas tipo verdadeiro/falso sobre a Reconquista
4. Exercicios de fonética/fonoloxía
5. Definicións de conceptos vistos na aula
Todas as solucións están no libro de texto, neste blog e nas fotocopias entregadas.
Esta semana repasamos as regras da acentuación en galego na nosa aula de 3º ESO. Deixo por aquí algúns cadros e algunhas ligazóns a webs de interese para repasar este tema para o exame do luns, onde haberá unha pregunta sobre esta cuestión.
Vai primeiro este cadro coas regras de acentuación xerais:
Deixo agora un cadro sobre a acentuación diacrítica. Moitas palabras que se escriben igual en galego (homógrafas), presenbtan unha única diferencia: o acento diacrítico. Este acento colócase para poder diferenciar estas palabras entre si:
Exemplo: á - a // póla - pola // etc.
Vexamos un cadro onde aparecen estas palabras:
Para saber máis, deixo esta ligazón onde poderedes atopar máis información sobre a acentuación na nosa lingua.
Achégase o día 17 de maio, o día das Letras Galegas, e nas nosas aulas xa estamos preparando a festa arredor das nosas letras. Na nosa clase de 4º ESO estamos realizando a lectura dunha das obras máis carismáticas da homenaxeada este ano, Mª Victoria Moreno.
En concreto, trátase da obra Anagnórise, que nos conta a historia dun rapaz, Nicolau, que escapa da súa casa e que, mentres fai autostop, é recollido por unha misteriosa muller que o levará cara ao seu destino, Madrid. No camiño irán coñecéndose un ao outro e irán sucedendo cousas que fagan mudar a historia...
Como traballo de aula, decideimos facer un AUDIOLIBRO, polo que estamos a colaborar todos e todas na súa lectura, á vez que o imos gravando para pendurar posteriormente nun podcast dunha canle de Ivoox.
Neste mes de abril estivemos traballando nas nosas aulas de 3º ESO o tema de literatura do Rexurdimento, onde nos achegamos á poesía de tres grandes autor@s das nosa letras como son Rosalía de Castro, Curros Enríquez e Eduardo Pondal.
No caso de Rosalía, escoitamos poesías dela na aula dunha maneira especial, pois escoitamos o disco da rapeira viguesa AID, titulado Rappoemas, que contén poesías rapeadas de Rosalía de Castro. Desta maneira, o alumnado achégase á poesía dunha maneira máis amena e moderna que aumenta o seu interese e atención na aula.
E foi así que decidimos facer un experimento semellante. Aproveitando o concurso de videopoemas da Casa Museo Manuel María que estaba en vigor ata o día 21 de abril, decidimos facer nós unha poesía de Rosalía en versión rap, para presentar ao concurso. Para o vídeo escollemos a poesía "A xustiza pola man", á que lle engadimos algúns versos para axeitala ao noso grupo.
Deste xeito, a realización do vídeo tería os seguintes obxectivos
traballar en grupo
coñecer a poesía de Rosalía de Castro
mellorar a dicción e o recitado
aprender sobre linguaxe audiovisual
coñecer programas de edición de audio
coñecer programas de edición de vídeo
presentarnos ao concurso de videopoemas
E finalmente, fixémolo. Parabéns a tod@s @s que participastes!!!
Hoxe estivemos vendo o tema da narrativa de pos-guerra na literatura galega que comezamos a semana pasada. Para facelo visualizamos dous videos, un de introdución do tema, no que coñecemos as obras e autores máis imporantes como Ánxel Fole, Álvaro Cunqueiro ou Blanco Amor.
Despois estivemos vendo unha curtametraxe que está baseada nun dos contos de Fole da súa obra cume, Á lus do candil. O título do conto é "O documento". Deixo por aquí unha ligazón á curtametraxe coa que seguiremos traballando esta semana...
Nestas semanas estivémonos achegando nas nosas aulas de 3º ESo a unha época imprescindible na nosa literatura: O Rexurdimento (1863+).
Ademais de reparar na situación sociopolítica e económica de Galicia neses anos, comezamos falando das primeiras obras do Pre-Rexurdimento para adentrarnos xa no propio movemento en si, coa obra de Rosalía de Castro, Cantares Gallegos (1863)
Deixo por aquí algús vídeos que poden servir de apoio:
Tamén deixo a poesía de Rosalía "A xustiza pola man", cantada pola rapeira viguesa AID, que traballamos na aula e coa que temos pensado facer un vídeo:
Na semana do 9 ao 13 de marzo estivemos vendo o tema da poesía de vangarda na Literatura galega (1920+), onde nos enfrentamos a textos das diferentes correntes vangardistas como o hilozoísmo (Amado Carballo), o neotrobadorismo (Noriega Varela) ou o creacionismo (Manuel Antonio).
Deixo por aquí algúns vídeos onde se nos fala deste tema:
